تعريب الاوفيس (تحويل واجهة برامج الاوفيس الى اللغة العربية )

    تعريب الاوفيس (تحويل واجهة برامج الاوفيس الى اللغة العربية )

المقصود بتعريب برامج الاوفيس يعنى تحويل النسخة من اللغة الانجليزية الى اللغة العربية يعنى بدل ما برامج الورد والاكسل والباور تفتح تلاقيهم انجليزى يعنى الاوامر كلها انجليزى لاء انت عاوز تخلى الاوامر والقوايم دى عربى يعنى بدل ما تفتح تلاقى مكتوب  FILE  تفتح تلاقى مكتوب ملف وهكذا مع باقى القوايم . 

ازاى اعرب برامج الاوفيس بقى ؟  : 

اول حاجة هتفتح اى برنامج من برامج الاوفيس من جهازك سواء ورد او اكسل او غيره ، وبعدين تيجى من تبويب file وبعدين تختار advanced ومنه هتلاقى حاجة اسمها language ، هتلاقى فى الجنب حاجة اسمها Display language والمفروض هتلاقى Arabic و English زى اللى فى الصورة دى ، هتقف على Arabic ومن الجنب هتختار move up لحد ما تكون هى الاولى ، هيطلب منك تعيد تشغيل البرنامج ، هتقفل وتفتح هتلاقى البرنامج بقى عربى .

 

طب فى حالة انك ملقتش اللغة العربية موجودة يبقى كدا النسخة عندك ناقصة اللغة العربية وبالتالى اكتب على جوجل تحميل حزمة تعريب اوفيس 2010  او تشوف الفيديو دا 👇

https://www.youtube.com/watch?v=LPXuqzLX9yQ

 

  وبالتوفيق يارب 💙

تعريب الويندوز (تحويل واجهة الويندوز الى اللغة العربية )

   تعريب الويندوز (تحويل واجهة الويندوز الى اللغة العربية )

المقصود بتعريب الواجهة يعنى تحويل النسخة من اللغة الانجليزية الى اللغة العربية يعنى لما تضغط كلك يمين وتيجى تختار الاوامر تيجى عربى زى عرض وفرز بدل view  و  sort by  . 

ازاى اعرب النسخة بقى ؟  : 

اول حاجة هتفتح اللينك دا 👇 وتضغط على كلمة download  اللى باللون الاخضر
https://vistalizator.en.uptodown.com/windows/download

هينزل عندك برنامج هتلاقيه داخل مجلد ال downloads  اللى جوا داخل my computer  ، هتضغط عليه وتفتح البرنامج دا وتقوله  run هيفتح معاك البرنامج بالشكل دا 

كل اللى عليك تعمله انك لو لاقيت تحت مع اللغات Arabic  اضغط عليها واختار من الجنب  change language     اول ما تعمل ريستارت او اعادة تشغيل لجهازك هتلاقى الويندوز عندك بقى عربى ، طب افرض ملقتش عندك عربى يبقى لازم تشوف الفيديو دا 👇

https://www.youtube.com/watch?v=LPXuqzLX9yQ

 

  وبالتوفيق يارب 💙

ايه المواد اللى ممكن ادخلها مع بعض ؟

   ايه المواد اللى ممكن ادخلها مع بعض ؟ 

بص أنا عن نفسى مش بفضل أنك تدخل مادتين  أو أكتر مع بعض ، الا لو أنت مستعجل ومحتاج تخلص الشهادة فى أقرب وقت وبالتالى لو هتدخل  اتنين مع بعض فانت محتاج مذاكرة قوية جدا مع دخول تجريبى . 

أسماء المواد اللى أدخلها مع بعض  : 

- التعاون مع التكنولوجيا 

- اساسيات الحاسب مع اساسيات الانترنت 

- ورد مع باور 

- اكسل مع طباعة

- الامن السيبرانى للمعلم 

هل كل المراكز هتوافق بدخول امتحانين مع بعض  : 

لاء مش كل المراكز بتوافق ، لازم تاخد موافقة المركز الاول عشان يسمحلك تمتحن أكتر من مادة فى نفس اليوم 

  وبالتوفيق يارب 💙

الطباعة وإدخال البيانات

 الطباعة وإدخال البيانات 

تعتبر مش مادة هو عبارة عن اختبار لسرعة ودقة الكتابة بتاعتك ، يعنى النتيجة بتكون كتبت كام كلمة والدقة كام ، مفيش رسوب في المادى دى بس خد بالك انها بتتكتب فى الشهادة فى الاخر ، فعشان كدا يفضل تجيب درجة كويسة  فيها .

ازاى اجيب درجة كويسة فى اختبار الطباعة

ادخل على الموقع دا  👇 واتدرب عليه كتير لحد ما تكتب أكتر من 10 كلمات صح فى الدقيقة مع دقة فوق ال  90  

https://10fastfingers.com/typing-test/arabic

الامتحان منه عربى ومنه انجلش ، بتختار اللى انت عاوزه واللغة اللى انت بتكتب بيها أسرع 

ولمعرفة شكل الامتحان من خلال الفيديو  دا 👇

https://www.youtube.com/watch?v=CwPCPCRRaAs

ايه الرموز اللى ممكن تجيلى فى امتحان العربى : 

متقلقش مش هيجيلك تشكيل خد بالك بس من التنوين اللى هو عبارة عن زار شيفت مع حرف ص والشدة
شيفت مع حرف ذ والاقواس مثلا شيفت مع 0 وشيفت مع 9 ، والفصلة شيفت مع حرف ن . مش هيجيلك حاجة تانية 

 ملاحظات هامة   :

الدرجة القليلة أقل من 10 

الدرجة المتوسطة من 10 إلى 15 

الدرجة العالية من 1 الى ال 20 او اكتر 

لو دخلت الامتحان ولقدر الله جبت درجة مش كويسة عادى مش هتفرق فى حاجة معاك .

  وبالتوفيق يارب 💙

أمن المعلومات للمعلم ( الأمن )

  أمن المعلومات للمعلم 

المادة دى دايما بخليها فى الاخر خالص مش عشان صعبة ، بالعكس ده من أسهل المواد فى المحتوى ، وكمان كلها نظرى لكن المشكلة فى امتحانها ، منها حوالى 4 نماذج امتحانات ، وانت وحظك فى الامتحان يا يجيلك نماذج من اللى منزلها عندى على القناة يا يجيلك النموذج الوحيد اللى لسه مش نزلته وده محتاج عشان تحله تكون شايف فيديوهات الشرح كويس جدا وقارئ الملخص ويفضل تكون قارئ كمان الكتاب ، الأمن دا ممكن تدخل تحل الامتحان فى عشر دقايق وممكن لقدر الله تدخله خمس مرات ، أنت وحظك أنت ونصيب ، طيب أعمل ايه عشان أضمن النجاح فى المادة دى بص يا سيدى على اللينكات اللى تحت دى : 

اولا : ده شرح سلسة الامن كله بجميع النماذ اللى قولت عليهم حوالى 7 فيديوهات  👇

https://www.youtube.com/watch?v=cntTi8Duasg&list=PL02NhKT84RvWdGFTAc1vNy7eT536_mUy2

وده لينك pdf  بتاع ملخص الكتاب اللى أنا بشرح منه 👇

https://drive.google.com/file/d/14zYHu9euZYr3NyX5Tvyks6sHyo0e4-o_/view

وده ملخص تانى PDF جميل جدا أحد الطلاب عامله بخط الأيد  👇

https://drive.google.com/file/d/156SYtW_uOaPPNUWUOhUE3FDCJfVRS-kt/view?fbclid=IwAR3wX2yDPKKkFttLSHFwQ-6XXtF2WsjYFhKMguL9dhxUj5Rre4HizTQ7qKU

وده لينك ال pdf  بتاع كتاب الامن اللى هو يفضل لو عند وقت تقرأ الكتاب دا  👇

https://drive.google.com/file/d/1778d5hHGpyUeWtAMvValamn_XWeexY87/view

خلصت مزاكرة خلاص فاضل تدخل تمتحن بنفسك وتشوف نتيجتك ايه ، ده امتحان تقدر تفتحه من موبايلك او كمبيوتر على الجزء النظرى والنتيجة هتطلع فى الاخر 👇

https://docs.google.com/forms/d/e/1FAIpQLSc-23PprrzFlgIaaFcAOKwguHezaTtXdDgHX-lzSwNT59IaSw/viewform

ان شاء الله لو زاكرت كل اللى فوق ده كويس جدا مش هتقل فى الامتحان عن 97% وهتخرج تدعيلي بعد الامتحان وممكن تحجز كمان مع الامن امتحان الطباعة لانه سهل جدا وعبارة عن كتابة بس وهنزل مقالة عنه بالتفصيل  ،،،       

  مستنى دعوتك :) 💙

مادة برنامج الإكسل

    مادة برنامج الإكسل 

دى سابع مادة تدخلها امتحان التيتشر بعد التعاون والتكنولوجيا واساسيات الحاسب الالى وأساسيات الانترنت والورد والباور ،المادة دى كلها عملى وفيها حوالى بس سؤالين او تلاتة نظري، الاكسل هو أصعب مادة عملي ممكن تدخلها ولازم تدرب عملى كتير على جهازك وتعمل الجدول اللى انا عملته فى الشرح وتمشى معايا خطوة خطوة  ، لازم تدخل تجريبى بالذات فى المادة دى ومتدخلش الامتحان النهائي غير وانت على الاقل معدى ال 90 %  لان كلها عملى والامتحان بتاعها 36 سؤال منها حوالى 34عملى 2نظرى فى 45 دقيقة، نسبة النجاح فى المادة دى كبيرة لو انت دخلت تجريبى وجبت فيه درجة عالية ا لأن الامتحان غالبا شبه أسئلة التجريبى والأسئلة اللى منزلها عندى على القناة ،  ، لو متعرفش ازاى تدخل تجريبى أنا منزل عندك هنا طريقة الدخول للامتحان التجريبى ،ممكن تدخل المادة دى بال3 واجهات اللى شرحتهم قبل كدا فى منشور مخصص اللى هما عربى واجهة عربى وانجلش واجهة انجلش وعربى واجهة انجلش .

ازاى أنجح فى المادة  دى :

لو هتدخل عربى واجهة عربى زى أغلبية الناس أول حاجة هتعرف المركز وتزاكر السلسة دى كاملة صدقنى مش هيخرج منها سؤال 👇

https://www.youtube.com/watch?v=_zAygV4Qiwg&list=PL02NhKT84RvXgj7jUhq6blEi6s6qHz2t0

و لو هتدخل عربى واجهة انجلش هتعرف المركز وتزاكر السلسة دى كاملة صدقنى مش هيخرج منها سؤال بردو 👇

https://www.youtube.com/watch?v=jmP6Cm3nEs8&list=PL02NhKT84RvXwEPvg-8sWY-Qcp_PfWINK

الكلام اللى فوق ده لو انت هتمتحن على اكسل 2010 واغلبية المراكز بتمتحن على 2010 طيب افرض المركز قالك انك هتمتحن المادة دى  على اكسل 2016 عشان احنا جددنا الاجهزة خلاص مفيش مشكلة انا منزل شرحه على القناة وهتزاكر اللينك دا  لو واجهة انجليزى مع نفس تجريبى بتاع 2010 عادى وعلى فكرة مفيش اختلاف كبير اصلا👇

https://www.youtube.com/watch?v=PB8wPDQCxGw&list=PL02NhKT84RvWqv09wvomXwITqbsJ_2534&index=2

وده لو هتدخل تمتحن على اكسل 2016 واجهة  عربى مع نفس تجريبى 2010 عادى هونفس التجريبى  👇

https://www.youtube.com/watch?v=SHkWtcj6oOQ&list=PL02NhKT84RvUpxebPhm29iKHOBLW8Ny9N&index=3

 لو زاكرت كل اللى فوق دا  مع دخولك تجريبى مش هتقل عن 97 % ان شاء الله وهتخرج  تدعيلى 

ملاحظات هامة : -

1- لازم تدخل تجريبى لازم لازم لازم وتجرب بنفسك فى المادة دى عشان تضمن النجاح

2- لو مش متاح تدخل تجريبى يبقى لازم تضاعف مذاكرتك وبردو هتكون مجازفة كبيرة جدا فى الاكسل 

3- متنساش تسأل المركز بتاعك انا همتحن على باور 2010 ولا 2016

4- مفيش PDF للاكسل لانه كله عملى واوعى تزاكر العملى من ورق ، حمل الفيديوهات .

5- شوف السلسة بتاعة الفيدويهات لانها شاملة الاسئلة الجديدة كاملة عشان تضمن النجاح 

6- لو معندكش وقت شوف الاسئلة بتاعة التجريبى بس وزاكرها كويس وبردو هتكون مجازفة كبيرة 

7- ميزة انك تشوف الشرح ان حتى لو جالك سؤال جديد فبتكون انت بالفعل شوفت الشرح فهتعرف تجاوب

 

مستنى دعوتك 💙

مادة برنامج الباور بوينت

   مادة برنامج الباور بوينت 

دى سادس مادة تدخلها امتحان التيتشر بعد التعاون والتكنولوجيا واساسيات الحاسب الالى وأساسيات الانترنت والورد ،المادة دى كلها عملى وفيها حوالى بس 6 أسئلة نظرى ، لازم تطبق على الجهاز فى المادة دى بالذات مثل الورد  لان كلها عملى والامتحان بتاعها 36 سؤال منها حوالى 33 عملى و3 نظرى فى 45 دقيقة، نسبة النجاح فى المادة دى كبيرة جدا لأن الامتحان غالبا شبه أسئلة التجريبى والأسئلة اللى منزلها عندى على القناة ،ودى من المواد اللى لازم تدخل فيها امتحان تجريبى  ، لو متعرفش ازاى تدخل تجريبى أنا منزل عندك هنا طريقة الدخول للامتحان التجريبى ،ممكن تدخل المادة دى بال3 واجهات اللى شرحتهم قبل كدا فى منشور مخصص اللى هما عربى واجهة عربى وانجلش واجهة انجلش وعربى واجهة انجلش .

ازاى أنجح فى المادة  دى :

لو هتدخل عربى واجهة عربى زى أغلبية الناس أول حاجة هتعرف المركز وتزاكر السلسة دى كاملة صدقنى مش هيخرج منها سؤال 👇

https://www.youtube.com/watch?v=I90z1Y30Y1A&list=PL02NhKT84RvW_0XMkXxIQFTvY3t_pc2a4

و لو هتدخل عربى واجهة انجلش هتعرف المركز وتزاكر السلسة دى كاملة صدقنى مش هيخرج منها سؤال بردو 👇

https://www.youtube.com/watch?v=6FghfnYj0ro&list=PL02NhKT84RvVIG_MUy5Npuqw25amCJqpQ

الكلام اللى فوق ده لو انت هتمتحن على باور 2010 واغلبية المراكز بتمتحن على 2010 طيب افرض المركز قالك انك هتمتحن المادة دى  باور 2016 عشان احنا جددنا الاجهزة خلاص مفيش مشكلة انا منزل شرحه على القناة وهتزاكر اللينك دا  لو واجهة انجليزى مع نفس تجريبى بتاع 2016 عادى وعلى فكرة مفيش اختلاف كبير اصلا👇

https://www.youtube.com/watch?v=Ny5AWxBjxs8&list=PL02NhKT84RvWqv09wvomXwITqbsJ_2534&index=3   

وده لو هتدخل تمتحن على باور 2016 واجهة  عربى مع نفس تجريبى 2010 عادى هونفس التجريبى  👇

https://www.youtube.com/watch?v=I7njOK1jNBU&list=PL02NhKT84RvUpxebPhm29iKHOBLW8Ny9N&index=2

 لو زاكرت كل اللى فوق دا  مع دخولك تجريبى مش هتقل عن 97 % ان شاء الله وهتخرج  تدعيلى 

ملاحظات هامة : -

1- لازم تدخل تجريبى وتجرب بنفسك فى المادة دى عشان تضمن النجاح

2- لو مش متاح تدخل تجريبى يبقى لازم تضاعف مذاكرتك وبردو هتكون مجازفة

3- متنساش تسأل المركز بتاعك انا همتحن على باور 2010 ولا 2016

4- مفيش PDF للباور لانه كله عملى واوعى تزاكر العملى من ورق ، حمل الفيديوهات .

5- شوف السلسة بتاعة الفيدويهات لانها شاملة الاسئلة الجديدة كاملة عشان تضمن النجاح 

6- لو معندكش وقت شوف الاسئلة بتاعة التجريبى بس وزاكرها كويس وبردو هتكون مجازفة

7- ميزة انك تشوف الشرح ان حتى لو جالك سؤال جديد فبتكون انت بالفعل شوفت الشرح فهتعرف تجاوب

8- الاسئلة النظرى واحد لان واجهة عربى زى واجهة انجلش فى النظرى فهتلاقى عندك فيديو واحد 

مستنى دعوتك 💙